Plantun de Prouvènço

Pèr coumpara dos planto d'encò nostre

Rubus saxatilis & Euonymus europaeus

Rubus saxatilis

Rosaceae

Nom en français : Ronce des rochers.

Descripcioun :
L'ambrouècha, coume se dis dins l'Ubaio, es un róumi que trachis en mountagno entre li pèiro o li pelouso, souto li bos clar e dins li gaudre. Èi lou soulet róumi que fai de fru roujo ; li dardaioun soun pas bèn fort e li ramo que rebalon au sòu fan fin qu'à 60 cm de long. Li flour, pulèu pichoto, se duerbon pas gaire. I'a pas trop pèr s'engana.

Usanço :
Sara peréu escricho dins quàuqui tèms.

Port : Aubret
Taio : 10 à 20 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Rubus
Famiho : Rosaceae

Ordre : Rosales

Coulour de la flour : Blanco
Petalo : 5
Ø (o loungour) flour : 10 à 12 mm
Flourido : Printèms - Estiéu

Sòu : Ca
Autour basso e auto : 200 à 2300 m
Aparado : Noun
Mai à juliet

Liò : Bos clar - Roucas - Gaudre
Estànci : Subremediterran à Subaupen
Couroulougi : Éurasiatico
Ref. sc. : Rubus saxatilis L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.